Энэ жил Улс төрийн хилс хэрэгт хэлмэгдэгсдийн дурсгалыг хүндэтгэх өдрийг тэмдэглэн өнгөрүүлэх 23 дахь, хэлмэгдэгсдийн гэгээн дурсгалыг мөнхжүүлэх 81 дэх жил тохиож байна.Сүхбаатар дүүргийн Иргэдийн Төлөөлөгчдийн Хурлын дарга бөгөөд Цагаатгах ажлыг удирдан зохион байгуулах дүүргийн салбар комиссын дарга Э.Ганбат, Иргэдийн Төлөөлөгчдийн Хурлын тэргүүлэгчдийн ажлын албаны дарга бөгөөд Цагаатгах ажлыг удирдан зохион байгуулах дүүргийн салбар комиссын нарийн бичгийн дарга Д.Азжаргал болон бусад албаны хүмүүс, хэлмэгдэгсдийн ар гэрийн төлөөллийн хамт Сонгинохайрхан уулын бэлд байрлах Улс төрийн хилс хэрэгт хэлмэгдэгсдийн дурсгалын хөшөөнд цэцэг өргөж, хүндэтгэл үзүүлэх ажиллагаанд оролцлоо.

Мөн Сүхбаатар дүүргийн Иргэдийн Төлөөлөгчдийн Хурлын дарга бөгөөд Цагаатгах ажлыг удирдан зохион байгуулах салбар комиссын даргын 2018 оны А/49 дүгээр захирамжаар Улс төрийн хилс хэрэгт хэлмэгдэгсдийн дурсгалыг хүндэтгэх өдрийг тэмдэглэн өнгөрүүлэхээр шийдвэрлэж, улс төрийн хилс хэрэгт өөрийн биеэр хэлмэгдэж цагаатгагдсан 9 иргэн, тэдгээрийн эхнэр, нөхөр, төрсөн үр хүүхэд нь болох 117 иргэнд хүндэтгэл үзүүллээ.